Marcos 1

João Batista e o batismo de Jesus

Пачатак Эвангельля Ісуса Хрыста, Сына Божага. ²Як напісана ў Прарокаў: «Вось Я пасылаю анёла Майго перад абліччам Тваім, які пракладзе шлях Твой перад Табою. ³Голас таго, хто кліча ў пустыні: Падрыхтуйце шлях Госпаду, простымі рабіце сьцежкі Яго».

⁴Зьявіўся Ян, хрысьцячы ў пустыні і абвяшчаючы хрышчэньне навяртаньня дзеля адпушчэньня грахоў. ⁵І выходзіла да яго ўся краіна Юдэйская і ўсе Ерусалімцы, і ўсе былі ім хрышчаны ў рацэ Ярдан, вызнаючы грахі свае. ⁶І быў Ян апрануты ў вярблюдавы волас, і скураны пояс на паясьніцы яго, і еў ён саранчу і дзікі мёд.

⁷І абвяшчаў ён, кажучы: «Ідзе за мной Дужэйшы за мяне, Якому я ня варты, нахіліўшыся, разьвязаць рамень сандалаў Ягоных. ⁸Я хрышчу вас вадой, а Ён будзе хрысьціць вас Духам Сьвятым». ⁹І сталася ў тыя дні, прыйшоў Ісус з Назарэту Галілейскага і быў ахрышчаны Янам у Ярдане.

¹⁰І адразу, як выходзіў з вады, убачыў адкрытае неба і Духа, як голуба, што зыходзіў на Яго. ¹¹І голас быў з неба: «Ты — Сын Мой улюбёны, у Якім маю ўпадабаньне».

A tentação e o início da pregação

¹²І адразу Дух вядзе Яго ў пустыню. ¹³І быў Ён там у пустыні сорак дзён, спакушваны шатанам; і быў між зьвяроў, і анёлы паслугавалі Яму. ¹⁴А пасьля таго, як Ян быў выдадзены, прыйшоў Ісус у Галілею, абвяшчаючы Эвангельле Валадарства Божага ¹⁵і кажучы, што споўніўся час і наблізілася Валадарства Божае: «Навярніцеся і верце ў Эвангельле!»

Jesus chama os primeiros discípulos

¹⁶І, праходзячы каля мора Галілейскага, убачыў Сымона і Андрэя, брата ягонага, што закідвалі [нерат] у мора, бо былі яны рыбаловамі. ¹⁷І сказаў ім Ісус: «Ідзіце за Мною, і Я зраблю вас лаўцамі людзей». ¹⁸І адразу, пакінуўшы сеткі свае, яны пайшлі за Ім.

¹⁹І, адыйшоўшыся адтуль недалёка, убачыў Ён Якуба Заўдыявага і Яна, брата ягонага, як яны ў чаўне напраўлялі сеткі. ²⁰І адразу паклікаў іх. І яны, пакінуўшы бацьку свайго Заўдыя ў чаўне з работнікамі, пайшлі за Ім.

O homem com espírito imundo

²¹І ўваходзяць у Капэрнаум. І адразу ў суботу, увайшоўшы ў сынагогу, Ён навучаў. ²²І ўсе дзівіліся з вучэньня Ягонага, бо Ён вучыў іх як той, хто мае ўладу, а не як кніжнікі. ²³І быў у сынагозе іхняй чалавек, [апанаваны] духам нячыстым, і закрычаў ён, ²⁴кажучы: «Пакінь! Што нам і Табе, Ісус Назарэец? Ты прыйшоў загубіць нас? Ведаю Цябе, хто Ты, Сьвяты Божы!»

²⁵Але прыгразіў яму Ісус, кажучы: «Замаўчы і выйдзі з яго!» ²⁶І нячысты дух, тузануўшы яго і загаласіўшы моцным голасам, выйшаў з яго. ²⁷І аслупянелі ўсе, таму пыталіся адзін аднаго, кажучы: «Што гэта? Што гэта за новае вучэньне, што з уладаю загадвае нячыстым духам, і яны слухаюцца Яго?»

²⁸І адразу пайшла чутка пра Яго паўсюль у-ва ўсёй ваколіцы Галілейскай.

Curas em Cafarnaum

²⁹І, адразу выйшаўшы з сынагогі, прыйшлі яны ў дом Сымона і Андрэя разам з Якубам і Янам. ³⁰Цешча ж Сымона ляжала ў гарачцы, і адразу кажуць Яму пра яе. ³¹І, падыйшоўшы, Ён падняў яе, узяўшы за руку, і адразу пакінула яе гарачка, і яна паслугавала ім.

³²А калі настаў вечар, як сонца зайшло, прыносілі да Яго ўсіх хворых і апанаваных дэманамі; ³³і ўвесь горад сабраўся перад дзьвярыма. ³⁴І Ён аздаравіў многіх хворых на розныя хваробы, і многіх дэманаў выгнаў, і не дазваляў дэманам гаварыць, што яны ведаюць, што Ён — Хрыстос.

Jesus ora e prega na Galileia

³⁵І раніцай, на самым досьвітку ўстаўшы, выйшаў, і пайшоў у пустыннае месца, і там маліўся. ³⁶І пайшлі за Ім Сымон і тыя, што з ім [былі], ³⁷і, знайшоўшы Яго, кажуць Яму: «Усе шукаюць Цябе».

³⁸А Ён кажа ім: «Хадзем у бліжэйшыя паселішчы, каб і там Я абвяшчаў, бо Я дзеля гэтага прыйшоў». ³⁹І Ён абвяшчаў у сынагогах іхніх па ўсёй Галілеі і выганяў дэманаў.

A cura do leproso

⁴⁰І прыходзіць да Яго пракажоны, просячы Яго і падаючы перад Ім на калені, і кажучы Яму: «Калі хочаш, можаш мяне ачысьціць». ⁴¹Дык Ісус, зьлітаваўшыся, працягнуў руку і дакрануўся да яго, і кажа яму: «Хачу, будзь ачышчаны». ⁴²І калі сказаў, адразу зыйшла з яго праказа і стаў ачышчаны.

⁴³І, грозна глянуўшы на яго, адразу выправіў яго, ⁴⁴і сказаў яму: «Глядзі, нікому нічога не кажы, але ідзі, пакажыся сьвятару і прынясі за ачышчэньне сваё тое, што загадаў Майсей, дзеля сьведчаньня ім». ⁴⁵Але ён, выйшаўшы, пачаў шмат абвяшчаць і шырыць кругом гэта слова, што [Ісус] ужо ня мог адкрыта ўвайсьці ў горад, але быў вонкі, у мясьцінах пустынных. І прыходзілі да Яго адусюль.