Jó 24

Os ímpios parecem ficar impunes

Чаму ня вызначаны час [суду] Усемагутнага, і тыя, што ведаюць Яго, ня бачаць дзён Ягоных? ²[Бязбожнікі] межы пераносяць, рабуюць статкі і пасьвяць іх, ³асла ў сіротаў адбіраюць, бяруць у заклад вала ў удавы, ⁴убогіх спіхваюць з дарогі, і ўсе прыгнечаныя зямлі змушаныя хавацца.

⁵Вось, як аслы ў пустыні, выходзяць [небаракі] на працу сваю, шукаючы хлеб для дзяцей у стэпе. ⁶Жнуць яны траву на полі і зьбіраюць вінаград у бязбожнага, ⁷начуюць голыя, без адзеньня, і ня маюць чым накрыцца ў холад, ⁸мокнуць у гарах ад дажджоў, і, ня маючы прытулку, туляцца да скалаў.

⁹Адрываюць сіротаў ад грудзей, і ад убогіх бяруць заклад. ¹⁰Голыя ходзяць яны, без адзеньня, і галодныя носяць снапы. ¹¹У мурах выціскаюць алей, і ціснуць віно ў тоўчні, і смагнуць.

¹²У гарадах, паміраючы, стогнуць; душа калечаных крычыць, але Бог не зважае на зло. ¹³Яны бунтуюцца супраць сьвятла, і ня ведаюць шляхоў Ягоных, і не сядзяць на сьцежках Ягоных. ¹⁴На сьвітаньні ўстае забойца, забівае ён беднага і ўбогага, і ноччу ходзіць як злодзей.

¹⁵Вока чужаложніка чакае цемры, кажучы: “Ня ўбачыць мяне вока”, і хавае твар свой за заслонай. ¹⁶У поцемках падкопваюцца пад дамы, а днём замыкаюцца, і ня ведаюць яны сьвятла. ¹⁷Бо раніца для іх усіх — цень сьмерці; бо ведаюць яны жудасьці цемры.

¹⁸Лёгкі ён на абліччы вады, і праклятая доля ягоная на зямлі, і ня вернецца ён на шлях да вінаградніку. ¹⁹Суш і сьпякота высушылі воды сьнегавыя, і гэткая адхлань для тых, што саграшылі. ²⁰Няхай забудзецца пра яго ўлоньне [маці], і няхай смакуюць цела ягонае чэрві, няхай не застаецца памяці пра яго, але як дрэва няхай зломіцца беззаконьнік.

²¹Ён пасьвіцца з бясплоднай, якая не нараджала, і ўдаве ня робіць дабра. ²²Ён здужвае сілай сваёю магутных, ён устае, і [ніхто] ня мае пэўнасьці ў жыцьці сваім. ²³[Бог] дае яму месца бясьпекі, і ён на гэта абапёрся, але вочы Ягоныя — на шляхах іхніх.

²⁴Падняліся яны трохі, і няма іх, і паніжаны, і прападаюць, і зрэзаныя яны як каласы. ²⁵Калі гэта ня так, хто зможа мяне аспрэчыць і марнотай палічыць словы мае?»