Efésios 2

Pela graça sois salvos

І вас, мёртвых праз праступкі і грахі вашыя, ²у якіх вы некалі хадзілі паводле веку гэтага сьвету, па волі князя, які валадарыць у паветры, духа, які дзейнічае цяпер у сынах непакорнасьці, — ³між якімі і мы ўсе жылі некалі ў пажаданьнях цела нашага, выконваючы волю цела і думак, і былі па прыродзе дзецьмі гневу, як і іншыя, — ⁴Бог, багаты міласэрнасьцю, праз вялікую любоў Сваю, якою палюбіў нас, ⁵і нас, мёртвых праз праступкі, ажывіў разам з Хрыстом, — ласкай [Божай] вы збаўленыя, — ⁶і ўваскрасіў, і пасадзіў у нябёсах у Хрысьце Ісусе, ⁷каб зьявіць у вяках, якія прыходзяць, бязьмернасьць багацьця ласкі Сваёй у ласкавасьці да нас у Хрысьце Ісусе.

⁸Бо ласкаю [Божай] вы збаўленыя праз веру; і гэта не ад вас — Божы дар: ⁹не праз учынкі, каб ніхто не хваліўся. ¹⁰Бо мы — твор Ягоны, створаныя ў Хрысьце Ісусе на добрыя ўчынкі, якія Бог загадзя прыгатаваў, каб мы ў іх хадзілі.

O muro da inimizade é derrubado

¹¹Дзеля гэтага памятайце, што вы, некалі пагане целам, называныя неабрэзанымі праз тых, якія завуцца абрэзанымі целам [абразаньнем], зробленым рукамі, ¹²што вы былі ў той час без Хрыста, адлучаныя ад грамадзянства Ізраіля і чужыя запаветам абяцаньня, ня маючы надзеі і бязбожнікі ў сьвеце. ¹³А цяпер у Хрысьце Ісусе вы, што былі некалі далёка, сталіся блізкімі праз кроў Хрыста.

¹⁴Бо Ён — супакой наш, Які ўчыніў з абодвух адно і зруйнаваў загарадку, што стаяла пасярэдзіне, ¹⁵зьнішчыўшы варожасьць Целам Сваім, Закон прыказаньняў, які быў у пастановах, каб з двух стварыць у Сабе аднаго новага чалавека, прыносячы супакой, ¹⁶і ў адным целе пагадзіць абодвух з Богам праз крыж, забіўшы на ім варожасьць.

¹⁷І, прыйшоўшы, Ён дабравесьціў супакой вам, якія далёка і якія блізка, ¹⁸бо праз Яго абодва маем доступ да Айца ў адным Духу.

Cristo, a pedra angular

¹⁹Дык вы ўжо не чужынцы і ня прыхадні, але суграмадзяне сьвятым і хатнія ў Бога, ²⁰збудаваныя на падмурку апосталаў і прарокаў, маючы Самога Ісуса Хрыста за кутні камень, ²¹на якім уся пабудова, ра­зам змацаваная, расьце ў сьвятую бажніцу ў Госпадзе, ²²на якім і вы разам будуецеся на жытло Божае Духам.