Jó 32

Eliú finalmente fala

א  וישבתו שלשת האנשים האלה--    מענות את-איוב כי הוא צדיק    בעיניו ²ב  ויחר אף אליהוא בן-ברכאל הבוזי--    ממשפחת-רם באיוב חרה אפו--    על-צדקו נפשו מאלהים ³ג  ובשלשת רעיו    חרה אפו על אשר לא-מצאו מענה--    וירשיעו את-איוב ⁴ד  ואליהו--חכה את-איוב בדברים    כי זקנים-המה ממנו לימים ⁵ה  וירא אליהוא--כי אין מענה בפי שלשת האנשים    ויחר אפו ⁶ו  ויען אליהוא בן ברכאל הבוזי--    ויאמר צעיר אני לימים    ואתם ישישים על-כן זחלתי ואירא    מחות דעי אתכם ⁷ז  אמרתי ימים ידברו    ורב שנים ידיעו חכמה ⁸ח  אכן רוח-היא באנוש    ונשמת שדי תבינם

⁹ט  לא-רבים יחכמו    וזקנים יבינו משפט ¹⁰י  לכן אמרתי שמעה-לי    אחוה דעי אף-אני ¹¹יא  הן הוחלתי לדבריכם--אזין עד-תבונתיכם    עד-תחקרון מלין ¹²יב  ועדיכם אתבונן    והנה אין לאיוב מוכיח--עונה אמריו מכם ¹³יג  פן-תאמרו מצאנו חכמה    אל ידפנו לא-איש ¹⁴יד  ולא-ערך אלי מלין    ובאמריכם לא אשיבנו ¹⁵טו  חתו לא-ענו עוד    העתיקו מהם מלים ¹⁶טז  והוחלתי כי-לא ידברו    כי עמדו לא-ענו עוד

¹⁷יז  אענה אף-אני חלקי    אחוה דעי אף-אני ¹⁸יח  כי מלתי מלים    הציקתני רוח בטני ¹⁹יט  הנה-בטני--כיין לא-יפתח    כאבות חדשים יבקע ²⁰כ  אדברה וירוח-לי    אפתח שפתי ואענה ²¹כא  אל-נא אשא פני-איש    ואל-אדם לא אכנה ²²כב  כי לא ידעתי אכנה    כמעט ישאני עשני