Job 18

Bildad describe la suerte del impío

І адказаў Більдад з Шуаху, і сказаў: ²«Калі пакінеце вы кідаць прамовы? Перш зразумейце, а потым будзем гаварыць. ³Чаму ты нас лічыш за жывёлу, і мы нячыстыя ў вачах тваіх?

⁴Што ты губіш душу тваю ў гневе тваім? Ці ж дзеля цябе апусьцее зямля, і з месца свайго зварухнецца скала? ⁵Бо сьвятло бязбожніка патухне, і не застанецца зьнічкі ад агню ягонага. ⁶Пацямнее сьвятло ў намёце ягоным, і сьветач, які ў ім, патухне.

⁷Звузяцца крокі моцы ягонай, намер ягоны здрадзіць яго. ⁸Ублуталіся ў сетку ногі ягоныя, і ходзіць ён паміж пастак. ⁹Пятля зловіць нагу ягоную, і пастка сашчэпіцца над ім.

¹⁰Схаваны на зямлі пасткі для яго, і сіло чакае яго на дарозе. ¹¹Палохаюць яго жахі і аблут­ваюць ногі ягоныя. ¹²Зьнікае ад голаду дужасьць ягоная, і загуба падрыхтаваная рэбрам ягоным.

¹³Хвароба зьесьць скуру ягоную, і зжарэ часткі цела ягонага першародны сьмерці. ¹⁴Зьнікне надзея ягоная з намёту яго, і пагоняць яго да валадара жахаў. ¹⁵Будзе ён жыць у намёце, але не ў сваім, і жытло ягонае будзе пасыпана серкаю.

¹⁶Зьнізу падсечаны карані ягоныя, а зьверху вянуць галінкі ягоныя. ¹⁷Памяць пра яго зьнікне з зямлі, і ня будзе слаўлена імя ягонае на плошчах. ¹⁸Прагоняць яго са сьвятла ў цемру, і ўвесь сьвет будзе гнаць яго.

¹⁹Ня будзе ані сына, ані ўнука ў народзе ягоным, і нікога не застанецца ў месцы вандраваньня ягонага. ²⁰У дзень ягоны аслупянеюць нашчадкі, і сучаснікаў ахопіць жудасьць. ²¹Такое вось жытло грэшніка, і такое месца таго, хто ня ведае Бога».