Miqueas 2
Ay de los que planean maldad en su cama
הוי חשבי און ופעלי רע על משכבותם באור הבקר יעשוה כי יש לאל ידם: 2וחמדו שדות וגזלו ובתים ונשאו ועשקו גבר וביתו ואיש ונחלתו: 3לכן כה אמר יהוה הנני חשב על המשפחה הזאת רעה אשר לא תמישו משם צוארתיכם ולא תלכו רומה כי עת רעה היא: 4ביום ההוא ישא עליכם משל ונהה נהי נהיה אמר שדוד נשדנו חלק עמי ימיר איך ימיש לי לשובב שדינו יחלק: 5לכן לא יהיה לך משליך חבל בגורל בקהל יהוה:
No prediquéis, dicen ellos
6אל תטפו יטיפון לא יטפו לאלה לא יסג כלמות: 7האמור בית יעקב הקצר רוח יהוה אם אלה מעלליו הלוא דברי ייטיבו עם הישר הולך: 8ואתמול עמי לאויב יקומם ממול שלמה אדר תפשטון מעברים בטח שובי מלחמה: 9נשי עמי תגרשון מבית תענגיה מעל עלליה תקחו הדרי לעולם: 10קומו ולכו כי לא זאת המנוחה בעבור טמאה תחבל וחבל נמרץ: 11לו איש הלך רוח ושקר כזב אטף לך ליין ולשכר והיה מטיף העם הזה:
Reuniré al remanente
12אסף אאסף יעקב כלך קבץ אקבץ שארית ישראל יחד אשימנו כצאן בצרה כעדר בתוך הדברו תהימנה מאדם: 13עלה הפרץ לפניהם פרצו ויעברו שער ויצאו בו ויעבר מלכם לפניהם ויהוה בראשם: