Giobbe 5:19-27

¹⁹En ses malfeliĉoj Li vin savos; En la sepa ne tuŝos vin la malbono.i

²⁰En tempo de malsato Li savos vin de la morto, Kaj en milito el la mano de glavo.j

²¹Kontraŭ la vipo de lango vi estos kaŝita; Kaj vi ne timos ruinigon, kiam ĝi venos.k

²²Dum ruinigo kaj malsato vi ridos; Kaj la bestojn de la tero vi ne timos;l

²³Ĉar kun la ŝtonoj de la kampo vi havos interligon, Kaj la bestoj de la kampo havos pacon kun vi.m

²⁴Kaj vi ekscios, ke paco estas en via tendo; Vi esploros vian loĝejon, kaj nenio mankos.n

²⁵Kaj vi ekscios, ke grandnombra estas via idaro Kaj via naskitaro estas kiel la herbo de la tero.o

²⁶En maljuneco vi iros en la tombon, Kiel envenas garbaro en sia tempo.p

²⁷Vidu, ni tion esploris, kaj tiel ĝi estas; Atentu tion, kaj sciu tion.