Salmi 22:1-31

¹למנצח על אילת השחר מזמור לדוד אלי אלי למה עזבתני רחוק מישועתי דברי שאגתי:a

²אלהי אקרא יומם ולא תענה ולילה ולא דומיה לי:b

³ואתה קדוש יושב תהלות ישראל:c

⁴בך בטחו אבתינו בטחו ותפלטמו:

⁵אליך זעקו ונמלטו בך בטחו ולא בושו:

⁶ואנכי תולעת ולא איש חרפת אדם ובזוי עם:d

⁷כל ראי ילעגו לי יפטירו בשפה יניעו ראש:e

⁸גל אל יהוה יפלטהו יצילהו כי חפץ בו:f

⁹כי אתה גחי מבטן מבטיחי על שדי אמי:g

¹⁰עליך השלכתי מרחם מבטן אמי אלי אתה:h

¹¹אל תרחק ממני כי צרה קרובה כי אין עוזר:i

¹²סבבוני פרים רבים אבירי בשן כתרוני:j

¹³פצו עלי פיהם אריה טרף ושאג:

¹⁴כמים נשפכתי והתפרדו כל עצמותי היה לבי כדונג נמס בתוך מעי:k

¹⁵יבש כחרש כחי ולשוני מדבק מלקוחי ולעפר מות תשפתני:l

¹⁶כי סבבוני כלבים עדת מרעים הקיפוני כארי ידי ורגלי:m

¹⁷אספר כל עצמותי המה יביטו יראו בי:n

¹⁸יחלקו בגדי להם ועל לבושי יפילו גורל:o

¹⁹ואתה יהוה אל תרחק אילותי לעזרתי חושה:

²⁰הצילה מחרב נפשי מיד כלב יחידתי:p

²¹הושיעני מפי אריה ומקרני רמים עניתני:

²²אספרה שמך לאחי בתוך קהל אהללך:q

²³יראי יהוה הללוהו כל זרע יעקב כבדוהו וגורו ממנו כל זרע ישראל:

²⁴כי לא בזה ולא שקץ ענות עני ולא הסתיר פניו ממנו ובשועו אליו שמע:r

²⁵מאתך תהלתי בקהל רב נדרי אשלם נגד יראיו:

²⁶יאכלו ענוים וישבעו יהללו יהוה דרשיו יחי לבבכם לעד:s

²⁷יזכרו וישבו אל יהוה כל אפסי ארץ וישתחוו לפניך כל משפחות גוים:t

²⁸כי ליהוה המלוכה ומשל בגוים:

²⁹אכלו וישתחוו כל דשני ארץ לפניו יכרעו כל יורדי עפר ונפשו לא חיה:

³⁰זרע יעבדנו יספר לאדני לדור:

³¹יבאו ויגידו צדקתו לעם נולד כי עשה:u