Ezechiele 24:3-14

³ומשל אל בית המרי משל ואמרת אליהם כה אמר אדני יהוה שפת הסיר שפת וגם יצק בו מים:

⁴אסף נתחיה אליה כל נתח טוב ירך וכתף מבחר עצמים מלא:

⁵מבחר הצאן לקוח וגם דור העצמים תחתיה רתח רתחיה גם בשלו עצמיה בתוכה:

⁶לכן כה אמר אדני יהוה אוי עיר הדמים סיר אשר חלאתה בה וחלאתה לא יצאה ממנה לנתחיה לנתחיה הוציאה לא נפל עליה גורל:

⁷כי דמה בתוכה היה על צחיח סלע שמתהו לא שפכתהו על הארץ לכסות עליו עפר:

⁸להעלות חמה לנקם נקם נתתי את דמה על צחיח סלע לבלתי הכסות:

⁹לכן כה אמר אדני יהוה אוי עיר הדמים גם אני אגדיל המדורה:

¹⁰הרבה העצים הדלק האש התם הבשר והרקח המרקחה והעצמות יחרו:

¹¹והעמידה על גחליה רקה למען תחם וחרה נחשתה ונתכה בתוכה טמאתה תתם חלאתה:

¹²תאנים הלאת ולא תצא ממנה רבת חלאתה באש חלאתה:

¹³בטמאתך זמה יען טהרתיך ולא טהרת מטמאתך לא תטהרי עוד עד הניחי את חמתי בך:

¹⁴אני יהוה דברתי באה ועשיתי לא אפרע ולא אחוס ולא אנחם כדרכיך וכעלילותיך שפטוך נאם אדני יהוה: