Salmos 140

Líbrame del hombre malo

David isquirbishan alabansa. Tayta Dios, fiyucunapita salbaycamay. Wañuchicojcuna wañuchimänanpita chapaycamay. ²Paycunaga mana allita rurayllatami yarpan. Imay örapis runa-masintaga pillyachiyllatami munaycan. ³Paycunapa shimenga caycan culebrapa lansëtanno. Rimashancuna caycan culebrapa benënunno. Selah ⁴Tayta Dios, chapaycamay fiyucuna charimänanpita. Chapaycamay wañuchicojcunapita. Paycunaga mana alliman chayanallätami shuyaraycan.

⁵Paycunaga alli-tucoj runacunami. Tuninäpaj wascatano churapämasha. Liyar pitucarcamänanpaj redata churapämasha. Nänicunaman togllancunata churasha manyapacar tuninäpaj. Selah ⁶Tayta Diostami ruwacushcä: «Gammi canqui Diosnë. Mañacamushäta wiyamay ari» nir. ⁷Tayta Dios, gammi canqui munayniyoj Salbamaj. Pillyachöpis gammi chapämanqui.

⁸Tayta Dios, fiyu runacuna munashantaga ama camacächiychu. Yarpashancunataga ama camacächiychu. Chayrämi manana alli-tucongachu. Selah ⁹Tumaparaycämajcuna «Maldisyunädu cachun» nishanga quiquincunaman ticrachun. ¹⁰Paycunaman shicwamuchun shansha. Paycunataga uchcucunaman wiñarpärichun imaypis manana llojshimunanpaj.

¹¹Washa-rimacunaga ama cachunchu cay pachachöga. Mana allita rurashanga fiyu runata quiquinta gatirächun wañuchinancama. ¹²Noga musyämi pobritaga Tayta Dios alli arriglashanta. Llaquicuycajcunatapis yanapanmi. ¹³Alli runacunaga alabashunquipämi. Munashayquino rurajcunaga ñaupayquichömi cawanga.