Salmos 92

Bueno es alabar al Señor

He hīmene, he waiata mō te rā Hāpati. He mea pai te whakawhetai ki a Ihowā, te hīmene atu ki tōu ingoa, e te Runga Rawa; ²te whakakite i tōu atawhai i te ata, i tōu pono i ngā pō katoa; ³i runga i te aho tekau, i te hātere; i te tangi huatau a te hāpa.

⁴Nāu hoki ahau, e Ihowā, i whakahari ki tāu mahi; ka whakamanamana ahau ki ngā meatanga a ōu ringa. ⁵Anō te nui o āu mahi, e Ihowā! Hōhonu rawa ōu whakaaro. ⁶Ko te tangata pōauau, kāhore ia e mātau; kāhore hoki tēnei e mōhiotia e te kūware.

⁷Kia pihi ake ngā whakaarokore ānō he tarutaru, ā, kia tupu ngā kaimahi katoa i te kino; he ngaromanga tēnā nō rātou ake ake. ⁸Ko koe ia, e Ihowā, kei runga rawa ake ake. ⁹Nā, ko ōu hoa whawhai, e Ihowā, nā, ko ōu hoa whawhai, ka ngaro; ka marara katoa ngā kaimahi i te kino.

¹⁰Otirā, ka ara i a koe tōku haona, ka pērā i tō te kau mākā; ka whakawahia ahau ki te hinu hou. ¹¹Ka kite hoki tōku kanohi i tāku i hiahia ai ki runga ki ōku hoariri, ka rongo ōku taringa i tāku i hiahia ai o te hunga kino e whakatika ana mai ki ahau. ¹²Ka rite te tupu o te tangata tika ki tō te nīkau; ka rite tōna nui ki tō te hīta i Repanōna.

¹³Ko te hunga i whakatōkia ki te whare o Ihowā ka tupu ki ngā marae o tō tātou Atua. ¹⁴Ka whai hua tonu rātou ua hina; kī tonu i te wai, matomato tonu; ¹⁵hei whakakite i te tika o Ihowā; ko ia tōku kōhatu, kāhore hoki ōna hē.