Salmos 19
Los cielos cuentan la gloria de Dios
Ki te tino kaiwhakatangi. He hīmene nā Rāwiri. E kōrerotia ana e ngā rangi te korōria o te Atua; ā, e whakaaturia ana e te kikorangi te mahi a ōna ringa. 2E puaki ana te reo o tēnā rangi, o tēnā rangi, e whakaatu mōhiotanga ana hoki tēnā pō, tēnā pō. 3Kāhore he hamumu, kāhore he kupu, kāhore e rangona tō rātou reo.
4Kua puta tā rātou aho ki te whenua katoa, ā rātou kupu, ā te pito rā anō o te ao. Whakatūria ana e ia ki reira te tapenākara mō te rā; 5ā, e puta ana ia me he tāne mārena hou i tōna whare moenga, whakaī ana ia, pērā ana me te tangata kaha e mea ana ki te oma whakataetae. 6Ko tōna putanga kei tētahi pito o te rangi, ā, whawhe noa ki tētahi pito; kāhore hoki tētahi mea e ngaro i tōna mahana.
7Tapatahi tonu te Ture a Ihowā, he mea whakatahuri i te wairua; pono tonu ngā whakaatu a Ihowā, e whakawhaiwhakaaro ana i te kūare. 8He tika ngā ako a Ihowā, e whakahari ana i te ngākau, he mā te whakahau a Ihowā, e whakamārama ana i ngā kanohi. 9He mā te wehi ki a Ihowā, pūmau tonu ake ake, he pono ngā whakaritenga a Ihowā, tika kau anō.
10Engari ēnā e hiahiatia ana i te kōura, āe, i te tino kōura ahakoa maha; reka atu i te honi, i te māturuturutanga iho o ngā honikoma. 11Nā ēnā anō tāu pononga i whakatūpato; he nui te utu ki te puritia. 12Ko wai e mātau ana ki ōna hē? Whakamākia ōku hara puku.
13Puritia anō tāu pononga kei riro i ngā hara whakakake hei rangatira mōku; ko reira ahau tū tika ai, ā, ka wātea i te hē nui. 14Kia manakohia ngā kupu a tōku māngai; me ngā whakaaro o tōku ngākau i tōu aroaro, e Ihowā, e tōku kāmaka, e tōku kaihoko.