Isaías 8

Pronto es el despojo

I kī mai anō a Ihowā ki ahau, “Tīkina atu tētahi papa nui māu, ka tuhituhi ki runga, ki te pene a te tangata, mō Mahereharara Hapaha. ²Nā, māku e mea ētahi kaiwhakaatu pono hei whakaatu mō tāku, arā a Uria tohunga rāua ko Tekaria tama a Teperekia.” ³Nā, ko tāku haerenga atu ki te poropiti wahine, kua hapū, whānau ake he tama. Kātahi a Ihowā ka kī mai ki ahau, “Huaina tōna ingoa ko Mahereharara Hapaha.

⁴Nō te mea mōhio rawa ake te tamaiti ki te karanga, ‘E tōku pāpā, e tōku whaea,’ ka riro ngā taonga o Ramahiku, me ngā mea parakete o Hamaria i te aroaro o te kīngi o Ahiria.” ⁵I kōrero mai anō a Ihowā ki ahau, i mea: ⁶“Nā, kua paopao nei tēnei iwi ki ngā wai āta rere o Hiroa, ā, e koa ana ki a Retini rāua ko te tama a Remaria; ⁷nā, tēnei te tākina mai nei e te Ariki ngā wai o te awa ki runga ki a rātou, he kaha, he nui, arā te kīngi o Ahiria, me tōna korōria katoa. Ka ngawhā anō ia ki runga i ōna pareparenga katoa, ka pari anō hoki ki runga i ōna tahatika katoa.

⁸Ka rere tonu atu ia ki a Hūrā; ka puhake atu, ā, ka puta; ka pā ki te kakī rawa; ā, ka kapi i te rohanga o ōna parirau te whānuitanga o tōu whenua, e Emānuera!” ⁹E anga, ka whakatupu raruraru, e ngā iwi, ā, ka pakaru rikiriki koutou; kia whai taringa hoki, e te hunga katoa o ngā whenua i tawhiti; whītiki, ā, ka pakaru rikiriki koutou; whītiki, ā, ka mongamonga noa koutou. ¹⁰Whakatakotoria he whakaaro, ā, ka taka noa iho; kōrerotia te kupu, e kore anō e tū; kei a mātou nei hoki te Atua.

Teme a Dios y a nadie más

¹¹Ko tā Ihowā kōrero hoki tēnei ki ahau i runga i te ringa kaha, me tāna whakaako anō i ahau kia kaua e haere i te ara o tēnei iwi; i kī mai: ¹²“Kaua e kī, ‘He hē te whakatakotoria nei;’ i ngā mea katoa e kī atu ai tēnei iwi, he hē te whakatakotoria nei; kaua hoki e wehi i tā rātou e wehi ai, kaua anō e pāwera ki reira. ¹³Ko Ihowā o ngā mano, ko ia tā koutou e whakatapu ai; ko ia hei wehi mā koutou, ko ia hei pāwera mā koutou.

¹⁴Ā, ka ai ia hei wāhi tapu; hei kōhatu tūtukitanga waewae ia, hei kāmaka e hinga ai ngā whare e rua o Īharaira, hei rore anō hoki, hei māhanga ki ngā tāngata o Hiruhārama. ¹⁵He tokomaha anō hoki o rātou e tūtuki te waewae ki reira; e hinga, pakaru iho, e māhangatia, mau tonu iho.” ¹⁶Takaia te whakaaturanga, hīritia te ture i roto i āku ākonga.

¹⁷Ā, ka tatari ahau ki a Ihowā e huna nei i tōna mata ki te whare o Hākopa, ka tūmanako atu ki a ia. ¹⁸Nanā, ko mātou ko ngā tamariki hōmai nei e Ihowā ki ahau hei tohu, hei mea whakamīharo i roto i a Īharaira, he mea nā Ihowā o ngā mano e noho nei i Maunga Hiona.

A la ley y al testimonio

¹⁹Nā, ki te mea mai rātou ki a koutou, “Me rapu tikanga koutou i te hunga he atua māori nei ō rātou, i ngā matakite, i te hunga e kōwhetewhete ana, e ngunguru ana. Kaua ianei tētahi iwi e rapu tikanga ki tō rātou Atua? Me rapu atu rānei rātou ki ngā mea mate mō ngā mea ora, ²⁰ki te ture, ki te whakaaturanga?” Ki te kore e rite tā rātou kōrero ki tēnei kupu, inā, kāhore he ata mō rātou. ²¹Ā, ka tika anō rātou nā reira, ruha noa iho, e mate ana i te kai. I a rātou ka mate nei i te kai, ka tupu te riri, ā, ka kangā e rātou tō rātou kīngi, me tō rātou Atua. Ā, ka tahuri ō rātou kanohi whakarunga; ²²ā, ka titiro rātou ki te whenua, nā, he whakapāwera, he pōuri, ko te pōruru o te mamae; ā, ka āia atu rātou ki roto ki te pōuri kerekere.