Proverbios 4

Sobre todo, adquiere sabiduría

Yaa ilmaan ko, mee gorsa abbaan namaaf kennu dhagaʼaa; qalbeeffadhaatii hubannaa argadhaa. ²Ani barumsa gaarii isinii nan kenna; kanaafuu barsiisa koo hin dhiisinaa. ³Yeroo ani mucaa xinnaa taʼee mana abbaa koo turetti, yeroo ani daaʼima dhiiga taʼee haadha kootiif ilma tokkicha turetti, ⁴inni akkana jedhee na barsiise; “Garaa kee guutuudhaan dubbii koo jabeessii qabadhu; seera koo eegi; ati ni jiraattaatii.

⁵Ogummaa argadhu; hubannaas argadhu; dubbii koo hin dagatin yookaan irraa hin jalʼatin. ⁶Ogummaa hin dhiisin; isheen si eegdii; ishee jaalladhu; isheenis si tiksitii. ⁷Ogummaan waan hunda caalti; kanaafuu ogummaa argadhu. Yoo isheen waan ati qabdu hunda si baasifte illee hubannaa argadhu.

⁸Ogummaa kabaji; inni ol si guddisaatii; isa hammadhu; innis si kabajaatii. ⁹Isheen kallacha bareedaa mataa kee irra siif keessi; gonfoo miidhagaa illee siif kenniti.” ¹⁰Yaa ilma ko dhagaʼi; waan ani jedhu illee fudhadhu; barri jireenya keetiis ni baayʼataa.

¹¹Ani karaa ogummaa irra sin qajeelcha; daandii qajeelaa irras sin buusa. ¹²Yeroo ati deemtu, tarkaanfiin kee hin ittifamu; yoo fiigdu illee ati hin gufattu. ¹³Qajeelfama jabeessii qabadhu; gad hin dhiisin; waan inni jireenya kee taʼeef jabeessii eeggadhu.

¹⁴Daandii hamootaa irra miilla kee hin dhaabin yookaan karaa jalʼootaa irra hin deemin. ¹⁵Irraa fagaadhu; irras hin deemin; irraa goriitii karaa kee irra qajeeli. ¹⁶Isaan waan hamaa hojjetan malee rafuu hin dandaʼaniitii; isaan hamma nama gufachiisanitti hirriba hin argatan.

¹⁷Isaan buddeena hamminaa nyaatu; daadhii wayinii kan dabaan argame dhugu. ¹⁸Karaan qajeeltotaa akkuma ifa barii barraaqaa kan hamma saafaatti ittuma fufee ifaa deemuu ti. ¹⁹Karaan hamootaa garuu akkuma dukkana guddaa ti; isaan waan isaan gufachiisu hin beekan.

²⁰Yaa ilma ko, waan ani jedhu qalbeeffadhu; dubbii kootiifis gurra kenni. ²¹Akka inni fuula kee duraa dhabamu hin godhin; garaa kee keessa ol kaaʼadhu; ²²inni warra isa argatuuf jireenya, dhagna namaa guutuufis fayyinaatii.

²³Waan hunda caalaa qalbii kee eeggadhu; burqaan jireenyaa achii baʼaatii. ²⁴Dubbii jalʼinaa afaan kee keessaa balleessi; haasaa hamaas arraba kee irraa fageessi. ²⁵Iji kee kallattiidhaan qajeelchee haa ilaalu; atis xiyyeeffadhuu fuula kee dura ilaali.

²⁶Miilla keetiif daandii wal qixxeeffadhu; karaan kee hundinuu haa jabaatu. ²⁷Gara mirgaatti yookaan gara bitaatti hin gorin; miilla kee hammina irraa eeggadhu.