Job 34

Dios no puede hacer mal

U-Elihu waqhubeka esithi: ²“Zwanini amazwi ami, lina madoda ahlakaniphileyo; lalelani kimi, lina madoda ayizifundiswa. ³Phela indlebe iyawahlola amazwi njengolimi lunambitha ukudla.

⁴Asizihluzeleni thina okulungileyo; kasifundeni ndawonye okuhle. ⁵UJobe uthi, ‘Kangilacala, kodwa uNkulunkulu kangahluleli ngokulunga. ⁶Loba mina ngiqondile, kuthiwa ngilamanga; loba ngingelacala, umtshoko wakhe ungihlaba isilonda esingelaphekiyo.’ ⁷UJobe kanti ungumuntu bani, onatha ukuklolodela njengamanzi?

⁸Uzwanana labantu abenza ububi; uhambisana labantu ababi. ⁹Ngoba uthi, ‘Umuntu kakumsizi ngalutho ukuzama ukuthokozisa uNkulunkulu.’ ¹⁰Ngakho lalelani kimi lina madoda azwisisayo. Kakube khatshana laye uNkulunkulu ukwenza ububi, khatshana kukaSomandla ukona.

¹¹Uyamphindisela umuntu ngalokho akwenzileyo; umehlisela lokho okufanele ukuziphatha kwakhe. ¹²Kakungeni engqondweni ukuthi uNkulunkulu angenza ububi, ukuthi uSomandla angakutshila ukwahlulela ngokulunga. ¹³Ngubani owambekayo phezu komhlaba na? Ngubani owathi kalawule umhlaba wonke na?

¹⁴Aluba wayengathanda asuse umoya wakhe lokuphefumula, ¹⁵bonke abantu babengatshabalala kanyekanye, umuntu wayezabuyela othulini. ¹⁶Nxa lilokuzwisisa, zwanini lokhu; lalelani lokhu engikutshoyo.

¹⁷Kambe lowo ozonda ukwahlulela ngokulunga angabusa na? Liyamlahla yini Yena oqotho njalo olamandla? ¹⁸Kayisuye yini othi emakhosini, ‘Kalisizi lutho,’ athi kwabayizikhulu, ‘Libabi,’ ¹⁹ongatshengisi ukwazisa amakhosana kulabanye loba athande abanothileyo kulabayanga, ngoba bonke bangumsebenzi wezandla zakhe?

²⁰Bayafa nje masinyane, loba phakathi kobusuku; abantu bayanyikinywa bedlule; abalamandla bayasuswa kungelasandla somuntu. ²¹Amehlo akhe aphezu kwezindlela zabantu; ubona zonke izinyathelo zabo. ²²Akulandawo emnyama loba ithunzi elisithileyo, lapho abenzi bobubi abangacatsha khona.

²³UNkulunkulu kasweli ukuthi aphinde abahlolisise abantu, ukuze abalethe ekwahlulelweni phambi kwakhe. ²⁴Engaqalanga wahlola uyabaphahlaza abalamandla abeke abanye endaweni yabo. ²⁵Ngoba ezinanzelela izenzo zabo, uyabagenqula ebusuku bahlifizeke.

²⁶Uyabajezisa ngenxa yobubi babo kube segcekeni emuntwini wonke, ²⁷ngoba baphambuka ekumlandeleni abaze banaka layiphi indlela yakhe. ²⁸Benza ukukhala kwabayanga kweza phambi kwakhe, laye wakuzwa ukukhala kwabasweleyo.

²⁹Kodwa nxa elokhu ezithulele, ngubani ongamsola na? Angafihla ubuso bakhe ngubani ongambona na? Kanti uphezu komuntu lesizwe ngokufanayo, ³⁰ukwalela ongamesabiyo uNkulunkulu ukuthi abuse, ukuze angafakeli abantu izifu. ³¹Akesithi umuntu athi kuNkulunkulu, ‘Ngilecala kodwa kangisayikona njalo.

³²Ngifundisa lokho engingakuboniyo; nxa ngenze okubi, kangisayikuphinda ngikwenze.’ ³³Pho uNkulunkulu akuvuze ngokwentando yakho na, wena usala ukuphenduka? Kumele ukhethe wena, hatshi mina; ngakho ngitshela lokho okwaziyo. ³⁴Amadoda alokuqedisisa azakutsho, amadoda ahlakaniphileyo abangizwayo ngisithi kini, ³⁵‘UJobe ukhuluma engelalwazi; amazwi akhe kawalambono.’ ³⁶Oh, uJobe angasake alingwe ngokweqileyo ngoba uphendule njengomuntu omubi!

³⁷Phezu kwesono sakhe wengeza ukuhlamuka; uyakloloda ngokuqakeza izandla zakhe phakathi kwethu andise amazwi akhe aphikisa uNkulunkulu.”