Proverbios 23

No te afanes por hacerte rico

Ka ibedo mondo ichiem gi ruoth, non maber gima ni e nyimi, ²ka in jawuoro to dimbri nono to onyalo keto pala e dwondi. ³Kik igomb chiembe mamit, nimar chiemono en mar wuondruok.

⁴Kik iwe tich bari ndasi ni mondo ibed ja-mwandu, bed gi rieko mondo iritri. ⁵Ngʼi mwandu mana matin nono, to bangʼe gidhi, nimar adiera gibiro bedo gi bwombe, kendo gifu gidhi e kor polo ka ongo. ⁶Kik icham chiemb jagwondo, kik igomb chiembe mamit, ⁷nimar en ngʼat mosiko paro nengo mochul. Owachoni niya, “Chiem kendo methi,” to chunye ok ni kodi.

⁸Ibiro ngʼogo mano matin mane ichamo kendo ibiro bedo ni iketho kindeni kuom pwoch mipuoyego. ⁹Kik iwuo ne ngʼat mofuwo, nikech obiro chayo rieko mag wechegi. ¹⁰Kik igol kidi mar kiewo machon, kata ima nyithindo maonge wuone puothegi; ¹¹nimar Jal moritogi en ratego; obiro chwakogi e kindi kodgi.

¹²Ket chunyi ne puonj to iti ne weche mag ngʼeyo. ¹³Kik itamri kumo nyathi; nimar chwat ok nyal nege. ¹⁴Kikumo nyathi kod kede to obiro reso chunye aa e tho.

¹⁵Wuoda, ka chunyi riek, eka chunya biro bedo mamor, ¹⁶chunya ma iye nobed mamor ka lewi wacho gima nikare. ¹⁷Kik ibed gi nyiego e chunyi nikech joricho; to kinde duto bedi gi dwaro mar luoro Jehova Nyasaye moloyo.

¹⁸Adier, ka itimo kamano to inibed gi geno e ndalo mabiro, kendo genoni ok nongʼad oko. ¹⁹Wuoda, winja, eka inibed mariek, kendo ket chunyi e yo moriere tir. ²⁰Kik iriwri gi jogo ma madho kongʼo mangʼeny kata jowuoro mohero ringʼo, ²¹nimar jomer kod jowuoro bedo jochan, kendo nongʼno rwakogi gi lewni moti.

²²Winj wuonu, nikech en ema nonywoli, kendo kik icha minu ka oti. ²³Adiera gi rieko gi puonjruok kod ngʼeyo tiend wach ema nyaka iyudi, kata dabed ni ingʼiewogi gi nengo matek. ²⁴Wuon ngʼat makare nigi mor maduongʼ; ngʼatno man-gi wuowi mariek obedo mamor kode.

²⁵Mad wuonu gi minu bed mamor; mad minu mane onywoli bed gi ilo. ²⁶Wuoda, miya chunyi, kendo ket wengegi orit yorena, ²⁷nimar dhako ma jachode en bur matut, to dhako mabayo en soko madiny.

²⁸Ka jamecho obuto korito, to omedo keto ji ma ok jo-adiera mangʼeny e kind ji. ²⁹En ngʼa man-gi masira? En ngʼa man-gi lit? En ngʼa man-gi lweny? En ngʼa man-gi ngʼur? En ngʼa man-gi adhonde ma ok owinjore? En ngʼa man-gi wangʼ makwar motimo remo? ³⁰Jogo madeko oko ka kongʼo, madhi mondo gibil kongʼo mokik mayoreyore.

³¹Kik ingʼi kongʼo kochiek mowalo, ka obabni e kikombe, ka omadhore mos kolor piny! ³²Bangʼe to okecho ka thuol kendo oketo kwiri kaka fu. ³³Wengeni biro neno gik mayoreyore to pachi paro gik morundore.

³⁴Ibiro chalo ngʼat ma nindo e nam mar apaka matek, ka inindo ewi apaka. ³⁵Ibiro wacho niya, “Gigoya, to ok ahinyra! Gigoya, to ok awinji! Karangʼo ma abiro chiewoe mondo adog ameth kendo?”