Salmos 48

Grande es el Señor en la ciudad de nuestro Dios

¹एक गीत। कोरह के बेटामन के एक भजन। महान ए यहोवा, अऊ हमर परमेसर के सहर म, ओकर पबितर पहाड़ म, ओह सबले जादा परसंसा के योग्य अय। ²सुघर हे अपन ऊंचई म अऊ येह जम्मो धरती के आनंद ए, सपोन के ऊंचई के सहीं हवय सियोन परबत, जऊन ह महाराजा के सहर अय। ³परमेसर ह उहां के किलामन म हवय; ओह अपनआप ला ओकर गढ़ के रूप म देखाय हवय। ⁴जब राजामन अपन सेना ला मिलाईन, जब ओमन एक संग आघू बढ़िन, ⁵त ओमन ओला देखिन अऊ चकित हो गीन; अऊ ओमन डर के मारे भाग गीन। ⁶ओमन उहां कांपे लगिन, ओमन ला छेवारी होवत माईलोगन के सहीं पीरा होईस। ⁷तेंह ओमन ला तरसीस के पानी जहाजमन सहीं नास कर देय याने कि पुरवई हवा ले ओमन ला चकनाचूर कर देय। ⁸सर्वसक्तिमान यहोवा के सहर म, हमर परमेसर के सहर म जइसे हमन सुने हन जइसे हमन देखे हन: परमेसर ह ओला सदाकाल बर सुरकछित बनाथे।

⁹हे परमेसर, तोर मंदिर के भीतर हमन तोर अब्बड़ मया ऊपर चिंतन-मनन करथन। ¹⁰हे परमेसर, तोर नांव के सहीं, तोर परसंसा ह धरती के छोर तक हबरत हे; तोर जेवनी हांथ ह धरमीपन ले भरे हवय। ¹¹तोर नियाय के काम के कारन सियोन परबत आनंद मनावत हे, अऊ यहूदा के बस्तीमन म खुसी हवय। ¹²सियोन करा जावव, ओकर चारों कोति चक्कर लगावव, ओकर गुम्मटमन के गनती करव। ¹³ओकर मजबूत दीवारमन ऊपर बने करके बिचार करव, ओकर महलमन ला धियान से देखव, ताकि अवइया पीढ़ी के मनखेमन ला तुमन ओमन के बारे म बता सकव। ¹⁴काबरकि ये परमेसर ह हमर सदाकाल के परमेसर अय; ओहीच ह आखिरी तक हमर अगुवई करही।