Salmos 91

El que habita al abrigo del Altísimo

Ang bisan sin-o nga magpaprotektar sa Labing Mataas nga Dios nga Makagagahom protektaran niya. ²Makasiling siya sa Ginoo, “Ikaw ang akon dalangpan kag mabakod nga palanaguan. Ikaw ang akon Dios nga akon ginasaligan.” ³Sigurado gid nga ilikaw ka niya sa mga siod kag sa makamamatay nga mga balatian.

⁴Protektaran ka niya pareho sang pagprotektar sang pispis sa iya mga buto sa idalom sang iya mga pakpak. Sa iya katutom, protektaran ka niya kag apinan. ⁵Indi ka dapat mahadlok sa mga kalahadlukan, sa pana sang mga kaaway, sa mga balatian, kag sa mga kahalitan nga nagaabot kon gab-i ukon adlaw. ⁶Bisan linibo ka tawo ang magkalamatay sa imo palibot, indi ka maano.

⁷Makita mo lang kon paano ginasilutan ang malain nga mga tawo. ⁸Tungod kay ginhimo mo nga dalangpan ang Ginoo, ang Labing Mataas nga Dios nga akon manugprotektar, ⁹wala sing kalamidad ukon kahalitan nga magaabot sa imo ukon sa imo panimalay.

¹⁰Kay suguon sang Dios ang iya mga anghel sa pagbantay sa imo bisan diin ka makadto. ¹¹Hakwaton ka nila para indi mapilas ang imo tiil sa bato. ¹²Tapakon mo ang mga leon kag ang dalitan nga mga man-og.

¹³[Nagsiling ang Dios,] “Luwason ko kag protektaran ang nagahigugma kag nagakilala sa akon. ¹⁴Kon magpanawag siya sa akon, sabton ko siya; kon ara siya sa kalisod, updan ko siya; luwason ko siya kag padunggan. ¹⁵Hatagan ko siya sang malawig nga kabuhi, kag ipakita ko sa iya ang akon pagluwas sa iya.”