Proverbios 3

Confía en el Señor de todo corazón

Anak, indi gid pagkalimti ang ginatudlo ko sa imo; tipigi sa imo tagipusuon ang mga ginasugo ko sa imo, ²kay makapalawig ini kag makapauswag sang imo kabuhi. ³Magpabilin ka nga maayo kag matutom; indi ina pagdulaa kundi tipigan mo gid sa imo tagipusuon.

⁴Kon himuon mo ini, maluyag sa imo ang Dios kag ang mga tawo, kag mangin maayo ang pagtulok nila sa imo. ⁵Magsalig ka sa Ginoo sa bug-os mo nga tagipusuon, kag indi ka magsalig sa imo kaugalingon nga kaalam. ⁶Dumduma ang Ginoo sa tanan mo nga ginahimo, kag tuytuyan niya ikaw sa husto nga dalan.

⁷Indi ka maghunahuna nga maalam ka na gid kundi magtahod ka sa Ginoo, kag indi ka maghimo sang malain. ⁸Kay makapaayo kag makapabaskog ina sa imo lawas. ⁹Padunggi ang Ginoo sa imo mga pagkabutang, pareho halimbawa sa paghalad sa iya sang una nga parte sang tanan mo nga patubas.

¹⁰Kon himuon mo ini, magasulubra ang mga patubas sa imo mga bodega kag ang duga sang ubas sa imo mga pulugaan. ¹¹Anak, indi pagpakalaina ang pagdisiplina sang Ginoo[sa imo]. Indi maglain ang imo buot kon ginasabdong ka niya. ¹²Kay ginadisiplina sang Ginoo ang iya mga ginapalangga pareho sang ginahimo sang isa ka amay sa iya anak nga iya ginakalipay.

La sabiduría es más preciosa que las joyas

¹³Bulahan ang tawo nga nakaangkon sang kaalam kag pag-intiendi. ¹⁴Kay mas mapuslanon pa ini sang sa pilak kag bulawan, ¹⁵kag mas malahalon pa sang sa mga alahas. Kag wala gid sing bisan ano nga butang nga imo ginahandom nga makatupong sini.

¹⁶Makapalawig kag makapauswag ini sang imo kabuhi, kag makahatag man sa imo sang kadungganan. ¹⁷Makabulig gid ini sa imo kabuhi kag makapaayo sang imo kahimtangan. ¹⁸Bulahan ang tawo nga nagapabilin nga maalamon; ang kaalam makapaayo kag makapalawig sang iya kabuhi.

¹⁹Paagi sa kaalam kag ihibalo, gintuga sang Ginoo ang kalibutan kag ang kalangitan, kag nagkalabukas ang mga tuburan kag naghatag ang mga panganod sang ulan. ²⁰Anak, tipigi gid ang imo kaalam kag ihibalo sa pagdesisyon sing husto. Indi pagpabay-i nga madula ini sa imo. ²¹Kay makahatag ini sa imo sang malawig kag matahom nga kabuhi.

²²Kag magakabuhi ka nga luwas sa katalagman kag indi ka maano. ²³Makatulog ka nga mahamuok, nga wala sing may ginakahadlukan. ²⁴Gani indi ka dapat mahadlok kon gulpi lang nga mag-abot ang makahaladlok nga mga hitabo, ukon kon laglagon na ang mga malain, ²⁵kay makasalig ka nga bantayan ka sang Ginoo; ilikaw niya ikaw sa katalagman.

²⁶Buligi ang mga dapat buligan kon masarangan mo man lang. ²⁷Indi na pagpabuwasi ang pagbulig sa imo isigkatawo kon mabuligan mo man lang siya subong. ²⁸Indi ka magplano sing malain kontra sa imo isigkatawo nga nagasalig sa imo bilang iya tupad-balay.

²⁹Indi ka magpakigbais sa imo isigkatawo sa wala sing kabangdanan, labi na kon wala man lang siya sing may nahimo nga malain sa imo. ³⁰Indi ka magkahisa sa mapintas nga tawo ukon magsunod sa iya mga ginahimo. ³¹Kay ginakangil-aran sang Ginoo ang mga balingag, pero nagasalig siya sa nagakabuhi sing husto.

³²Ginapakamalaot sang Ginoo ang panimalay sang mga malain, pero ginapakamaayo niya ang panimalay sang mga matarong. ³³Ginayaguta niya ang nagapangyaguta, pero ginakaluoyan niya ang mapainubuson. ³⁴Ang mga maalamon padunggan, pero ang mga buang-buang pakahuy-an.