Salmos 48

Grande es el Señor en la ciudad de nuestro Dios

Ang awit sa mga anak ni Kora. Gamhanan ang Ginoo nga atong Dios, ug takos gayod nga dayegon diha sa iyang siyudad nga anaa sa iyang balaang bukid. Matahom ang kahabog niini ug naghatag kini ug kalipay sa tibuok kalibotan. Kining balaan nga Bukid sa Zion mao ang siyudad sa Gamhanan nga Hari. ²Anaa ang Dios sa lig-on nga bahin sa Jerusalem ug gipakita niya nga siya kasaligan nga tigpanalipod. ³Nagtigom ang mga hari aron sa pagsulong sa Jerusalem, ⁴apan pagkakita nila niini, nahingangha sila; nahadlok sila ug nanagan.

⁵Nangurog sila sa kahadlok daw sa babayeng nagbati. ⁶Gilaglag sila sa Dios sama sa mga barko sa Tarshish nga gikuso-kuso sa hangin nga gikan sa sidlakan. ⁷Nadungog namo ang gipanghimo sa Dios kaniadto, ug karon nakita na gayod namo kini sa siyudad sa among Dios, ang Ginoo nga Makagagahom. Lig-onon niya kining siyudara hangtod sa kahangtoran.

⁸O Dios, namalandong kami sa imong gugma sulod sa imong Templo. ⁹Bantogan ka ug gidayeg sa mga tawo sa tibuok kalibotan, tungod kay nagmadaogon ka pinaagi sa imong gahom. ¹⁰Hinaut nga maglipay ang mga lumulupyo sa Zion ug ang mga lumulupyo sa ubang mga lungsod sa Juda, tungod sa imong matarong nga paghukom.

¹¹Mga Israelinhon, libota ninyo ang Zion ug ihapa ang mga tore niini. ¹²Tan-awa ninyo pag-ayo ang mga paril ug ang lig-ong bahin niini nga siyudad, aron masultihan ninyo ang sunod nga mga henerasyon ¹³nga ingon niana ang Dios nga atong gialagaran. Dios siya sa walay kataposan. Siya ang gagiya kanato hangtod sa kahangtoran.