Salmos 145
Bendeciré tu nombre eternamente
1༼དཱ་བིད་ཀྱི་བསྟོད་པའི་མགུར༌མ།༽ ང་ཡི་དཀོན་མཆོག་ང་ཡི་རྒྱལ་པོ༌ལགས། །བདག་གིས་ཁྱེད་ལ་གུས་ཤིང་འདུད་པ༌དང༌། །རྟག་ཏུ་ཁྱེད་ཀྱི་མཚན་ལ་བསྔགས་པར༌བྱ།། 2བདག་གིས་ནམ་རྒྱུན་ཁྱེད་ལ་བསྟོད་པ༌དང༌། །ཁྱེད་ཀྱི་མཚན་ལ་ནམ་ཡང་བསྔགས་པར༌བྱ།། 3ཡ་ཝཱེ་རབ་ཏུ་ཆེ་ཞིང་བསྔགས་པར༌འོས། །ཉིད་ཀྱི་ཆེ་བ་བསམ་གྱིས་མི་ཁྱབ༌བོ།། 4མི་རབས་ཀུན་གྱིས་ཁྱེད་ཀྱི་མཛད་པར༌བསྔགས། །ཁོ་ཚོས་ཁྱེད་ཀྱི་མཛད་པ་སྟོབས་ལྡན༌སྒྲོག། 5ཁྱེད་ཀྱི་བརྗིད་ཉམས་ལྡན་པའི་གཟི་དཔལ༌དང༌། །ངོ་མཚར་མཛད་པར་བསམ་གཞིགས་མང་དུ༌བཏང༌།། 6མི་ཡིས་ཁྱེད་ཀྱི་འཇིགས་རུང་ནུས་མཐུ༌སྒྲོག །ངས་ཀྱང་ཁྱེད་ཀྱི་ཆེ་བ་སྒྲོག་པ༌ལགས།། 7འཇིག་རྟེན་མི་ཡིས་ཁྱེད་ཀྱི་ཐུགས་རྗེ༌ནི། །དྲན་ཞིང་དྲན་ཏེ་ཀུན་ལ་སྒྲོག་འགྱུར༌ཞིང༌། །ཁྱེད་ཀྱི་བདེན་པ་ཉིད་ལ་བསྔགས་པར༌བྱེད།། 8ཡ་ཝཱེར་ཐུགས་རྗེ་ལྡན་ཞིང་སྙིང་རྗེ༌ཆེ། །རང་དགར་མི་ཁྲོ་བྱམས་བརྩེ་ཕུན་སུམ༌ཚོགས།།
9ཁོང་གིས་མི་རིགས་ཐམས་ཅད་བདེ་བར༌སྐྱོང༌། །ཁོང་གི་བྱམས་བརྩེ་ཆེན་པོ་དེ་ཡིས༌ནི། །ཉིད་ཀྱིས་བསྐྲུན་པ་ཀུན་ལ་ཁྱབ་པར༌བྱེད།། 10ཀྱེ་ཀྱེ་ཡ་ཝཱེ་ཁྱེད་ཀྱི་མཛད་པ༌ཀུན། །ཁྱེད་ལ་གཏང་རག་འབུལ་བར་འགྱུར་བ༌དང༌། །དད་ལྡན་རྣམས་ཀྱིས་ཁྱེད་ལ་བསྔགས་པར༌བྱེད།། 11དེ་ཚོས་ཁྱེད་ཀྱི་རྒྱལ་སྲིད་དཔལ་བརྗོད༌ཅིང༌། །ཁྱེད་ཀྱི་མཛད་པ་སྟོབས་ལྡན་གླེང་བར༌བྱེད།། 12མི་ཡིས་ཁྱེད་ཀྱི་མཛད་པ་སྟོབས་ལྡན༌དང༌། །བརྗིད་ཉམས་ལྡན་པའི་རྒྱལ་སྲིད་གཟི་དཔལ༌ནི། །ཤེས་པར་བྱ་ཆེད་ཡིན་པ་གོར་མ༌ཆག། 13ཁྱེད་ཀྱི་རྒྱལ་སྲིད་རྟག་ཏུ་བཞུགས་པ༌དང༌། །ཁྱེད་ཀྱི་མངའ་ཐང་དུས་རབས་ཀུན་ལ༌ཁྱབ།། 14ས་རུ་འགྱེལ་བ་ཐམས་ཅད་ཡ་ཝཱེས༌སྐྱོར། །གཉའ་གནོན་ཐེབས་པ་ཀུན་པོ་ཁོང་གིས༌འདེགས།། 15འཇིག་རྟེན་མིག་ཀུན་ཁྱེད་ལ་རེ་ལྟོས༌བཅངས། །ཁྱེད་ཀྱིས་དུས་ལྟར་ཁ་ཟས་གནང་བར༌མཛད།། 16ཁྱེད་ཀྱིས་ཕྱག་ཟུང་བརྐྱངས་ནས་སྲོག་ལྡན༌ཀུན། །ཡིད་ཀྱི་འདོད་པ་ཡོངས་སུ་ཚིམ་པར༌མཛད།།
17ཡ་ཝཱེས་མཛད་པའི་འཕྲིན་ལས་ཡོད་དོ༌ཅོག །དྲང་བདེན་མ་ཡིན་པ་ནི་ཅི་ཡང༌མེད། །ཁོང་གིས་བསྐྲུན་པ་ཀུན་ལ་བྱམས་བརྩེ༌ཁྱབ།། 18སུ་ཞིག་གིས་ནི་ཀུན་སློང་རབ་དག༌གིས། །ཁོང་ལ་ཞུས་ན་ཁོང་ནི་ཉེ་བར༌བཅར།། 19སུ་ཞིག་ཁོང་ལ་གུས་ཤིང་འཇིགས་གྱུར༌ན། །ཁོང་གིས་དེ་ཡི་རེ་བ་སྐོང་བྱེད༌ཅིང༌། །དེ་རྣམས་འོ་དོད་གསན་ཞིང་སྐྱོབ་པར༌མཛད།། 20ཡ་ཝཱེས་རང་ལ་གཅེས་མཁན་རྣམས་སྲུང༌ཞིང༌། །མི་ངན་ཐམས་ཅད་རྩ་ནས་འཇོམས་བྱེད༌དོ།། 21བདག་གི་ངག་ལས་ཡ་ཝཱེར་བསྟོད་བསྔགས༌བརྗོད། །སྲོག་ལྡན་ཀུན་གྱིས་ཁྱེད་ཀྱི་མཚན་དམ༌པར། །རྟག་ཏུ་བསྟོད་ཅིང་བསྔགས་པ་བརྗོད་པར༌ཤོག།