Proverbios 3

Confía en el Señor de todo corazón

Fis mwen an, pa bliye enstriksyon mwen an, men kite kè ou kenbe kòmandman Mwen yo; ²paske konsa, longè jou, ane lavi ak lapè yo va vin ogmante sou ou. ³Pa kite dousè ak verite kite ou. Mare yo antoure kou ou. Ekri yo sou tablo kè ou.

⁴Konsa, ou va twouve favè avèk bon repitasyon nan men Bondye a, ak moun. ⁵Mete konfyans nan SENYÈ a ak tout kè ou; pa apiye sou pwòp bon konprann pa w. ⁶Nan tout chemen ou yo rekonèt Li; konsa Li va fè pa ou yo vin dwat.

⁷Pa vin saj nan pwòp zye pa ou; krent SENYÈ a e vire kite mal. ⁸Li va sèvi kon yon gerizon pou kò ou, ak rafrechisman a zo ou. ⁹Onore SENYÈ a ak sa ki soti nan bonte ou yo; ak premye pati nan tout prodwi ou, ¹⁰pou depo ou yo kab vin plen ak abondans, e pou sitèn ou yo plen ak diven tounèf.

¹¹Fis mwen an, pa rejte disiplin SENYÈ a, ni rayi repwòch Li, ¹²Paske sila ke SENYÈ a renmen an, Li korije li, jis tankou yon papa konn korije fis nan sila li pran plezi a.

La sabiduría es más preciosa que las joyas

¹³A la beni nonm ki twouve sajès, e nonm ki vin genyen bon konprann nan beni! ¹⁴Paske avantaj li pi bon ke avantaj ajan, e pwofi li pi bon ke lò fen. ¹⁵Li pi presye pase bijou; e okenn lòt bagay ke ou ta dezire pa kab konpare avèk li.

¹⁶Lavi ki long va trouve nan men dwat li. Nan men goch li se richès ak lonè. ¹⁷Chemen li yo byen dous, e tout pa li yo se lapè. ¹⁸Li se yon pyebwa lavi a sila ki pran l yo, e byen kontan se tout sila ki kenbe l fèm yo.

¹⁹SENYÈ a ak sajès te fonde latè a; ak bon konprann Li te etabli syèl yo. ²⁰Ak konesans Li, fon yo te vin ouvri, e syèl yo te vin degoute lawouze. ²¹Fis mwen an, pa kite yo vin disparèt devan zye ou; kenbe bon sajès ak bon konprann.

²²Konsa yo va lavi pou nanm ou ak dekorasyon pou kou ou. ²³Konsa, ou va mache nan chemen ou ak sekirite, e pye ou p ap chape. ²⁴Lè ou kouche ou p ap pè; kouche ou ak dòmi ou va byen dous.

²⁵Pa pè gwo laperèz ki parèt sibitman, ni atak a mechan an lè l vini. ²⁶Paske Bondye va konfyans ou, e va veye pye ou pou l pa pran nan pyèj. ²⁷Pa refize fè byen a sila ki merite l yo, si se nan kapasite ou pou fè l.

²⁸Pa di vwazen ou: “Ale e retounen pita”, oswa “Demen, m ap bay ou”, lè l deja nan men w. ²⁹Pa kalkile mal kont vwazen ou pandan l ap viv an sekirite akote ou. ³⁰Pa fè kont ak yon nonm san koz, depi li pa konn fè ou tò.

³¹Pinga ou gen anvi a yon nonm vyolan, ni pa chwazi chemen li yo. ³²Moun pèvès se yon abominasyon a SENYÈ a; men SENYÈ a vin toupre a sila yo ki dwat yo. ³³Malediksyon SENYÈ a sou kay mechan yo, men Li beni abitasyon a moun dwat yo.

³⁴Li moke moun k ap moke, men Li bay gras a sila ki aflije yo. ³⁵Saj yo va resevwa gran respè kon eritaj, men moun plen foli yo va dezonore.