1 Juan 3

Mirad qué amor nos ha dado el Padre

Gade ki gran amou Papa a te bay nou ke nou ta vin rele timoun a Bondye! Konsa, se sa nou ye. Pou rezon sa lemonn pa rekonèt nou, paske li pa t rekonèt Li. ²Alò, chè zanmi yo, nou se timoun a Bondye, epi li poko fin devwale ki sa n ap ye. Nou konnen ke lè Li parèt nou va tankou Li, paske nou va wè Li menm jan ke Li ye a. ³Epi tout moun ki gen espwa sa sou Li, vin pi li menm, menm jan ak Li.

⁴Epi tout moun ki pratike peche, transgrese lalwa. Peche a se transgresyon lalwa. ⁵Nou konnen ke Li te parèt pou Li ta kapab retire peche yo, epi nan Li pa gen peche. ⁶Okenn moun ki rete nan Li pa peche, men okenn moun ki viv nan peche pa t wè Li, ni yo pa konnen Li.

⁷Timoun yo, pa kite pèsòn twonpe nou. Sila ki pratike ladwati a jis, menm jan ke Li jis la. ⁸Men sila ki pratike peche a se dyab la, paske dyab la te peche depi kòmansman an. Fis a Bondye a te parèt pou rezon sila, ke Li ta kapab detwi zèv a dyab yo. ⁹Nanpwen pèsòn ki ne de Bondye ki pratike peche paske jèm Li tou rete nan li, epi li pa kapab peche, paske li ne a Bondye.

¹⁰Konsa, konnen ke pitit a Bondye yo, ak pitit a dyab yo byen klè. Nenpòt moun ki pa pratike ladwati a pa de Bondye, ni sila ki pa renmen frè li a.

Amor de hecho y en verdad

¹¹Paske sa se mesaj la ke nou te tande depi kòmansman an ke nou dwe renmen youn lòt. ¹²Pa kon Caïn, ki te apatyen a mechan an, epi te asasinen frè l. Men poukisa li te asasinen li? Paske zèv li te mal, epi sa a frè l yo te jis. ¹³Pa etone, frè yo, si lemonn rayi nou.

¹⁴Nou konnen ke nou kite lanmò, epi antre nan lavi akoz ke nou renmen frè nou yo. Sila ki pa renmen, rete nan lanmò. ¹⁵Nenpòt moun ki rayi frè l se yon asasen. Epi nou konnen ke nanpwen asasen ki gen lavi etènèl la anndan li. ¹⁶Men konsa nou rekonèt lanmou; ke Li te bay vi Li pou nou. Epi konsa, nou ta dwe bay vi nou yo pou frè nou yo.

¹⁷Men nenpòt moun ki gen byen a lemonn sa, pou l wè frè l nan bezwen, epi sere kè l kont li, ki jan lanmou Bondye kapab rete nan li? ¹⁸Timoun yo, pa kite nou renmen avèk pawòl, ni avèk lang, men nan zèv ak nan verite. ¹⁹Nou va rekonèt konsa ke nou nan laverite, epi va gen asirans nan kè nou devan Li: ²⁰si kè nou kondane nou, Bondye bokou pi gran ke kè nou, epi Li konnen tout bagay.

²¹Byeneme yo, si kè nou pa kondane nou, nou gen konfyans devan Bondye. ²²Pou sa a, nenpòt sa ke nou mande, nou va resevwa l de Li, paske nou kenbe kòmandman Li yo, epi fè bagay ki fè plezi devan zye Li yo. ²³Men sa se kòmandman Li, ke nou kwè nan non a Fis Li a, Jésus Kri, epi renmen youn lòt, kon Li te kòmande nou an.

²⁴Sila a ki kenbe kòmandman Li yo, rete nan Li, epi Li rete nan li menm. Nou konnen konsa ke Li rete nan nou, akoz Li te bay nou Lespri Li.