Job 33

Dios habla de más de una manera

Дык выслухай, Ёве, прамову маю і прыхілі вуха на ўсе словы мае. ²Вось, я адкрываю вусны свае, і язык мой гаворыць у вуснах маіх. ³Ад шчырага сэрца плывуць словы мае, і яснае веданьне кажуць вусны мае.

⁴Дух Божы ўчыніў мяне, і дыханьне Усемагутнага ажывіла мяне. ⁵Падрыхтуйся і стань перад абліччам маім, і прадстаў справу тваю. ⁶Вось, я, як вусны твае перад Богам, таксама я з гліны ўфармаваны.

⁷Вось страх [перада] мною няхай цябе не палохае, і рука мая няхай ня будзе цяжкаю над табою. ⁸Тое, што ты гаварыў — у вушах маіх, і я чуў голас словаў тваіх: ⁹“Чысты я, бяз грэху, беззаганны, і няма віны ў-ва мне.

¹⁰Але [Бог] знайшоў абвінавачваньне супраць мяне, і лічыць мяне ворагам Сваім. ¹¹Ён закаваў у кайданы ногі мае, пільнуе ўсе сьцежкі мае”. ¹²Вось, у гэтым ты няправедны. Я адкажу табе, бо Бог большы за чалавека.

¹³Чаму ты спрачаешся з Ім, што Ён не адказвае табе ніводнага слова? ¹⁴Бог прамаўляе і адзін раз, і другі, а [чалавек] не зважае на гэта. ¹⁵У сьне і ў відзежы начным, калі моцны сон агартае людзей і ў дрымоце на ложку, ¹⁶адкрывае Ён вуха людзям, і палохае іх у зьявах, ¹⁷каб адвярнуць чалавека ад учынкаў [ліхіх], і вызваліць яго ад пыхлівасьці, ¹⁸каб захаваць душу ягоную ад магілы, і жыцьцё ягонае, каб не загінула ад дзіды.

¹⁹Ён дакарае яго хваробаю на ложку ягоным і болем безупынным у костках ягоных. ²⁰І жыцьцё ягонае брыдзіцца хлебам, і душа ягоная — страваю найлепшаю. ²¹Цела яго зьнікае на вачах, і косткі, звычайна ня бачныя, адкрываюцца.

²²Набліжаецца душа ягоная да магілы, і жыцьцё ягонае — да памёршых. ²³Калі пры ім анёл-абаронца, адзін з тысячы, які распавядзе чалавеку, у чым праведнасьць ягоная, ²⁴тады зьлітуецца [Бог] над ім і скажа: “Выратуй яго, каб не ішоў ён у магілу, бо Я знайшоў выкуп [за яго]”.

²⁵Тады цела ягонае стане, як у маладосьці, і вернецца ён у дні юнацтва свайго. ²⁶Ён будзе маліць Бога, і [Бог] будзе спагадны яму, і ўбачыць аблічча ягонае радасным, і верне чалавеку праведнасьць ягоную. ²⁷І ён паглядзіць на людзей і скажа: “Я грашыў і чыніў няправасьць, і не аднагароджана мне.

²⁸Ён выкупіў душу маю, каб не трапіла ў магілу, і будзе бачыць сьвятло жыцьцё маё”. ²⁹Вось, усё гэта робіць Бог два, і тры разы з чалавекам, ³⁰каб адвесьці душу ягоную ад магілы, і прасьвятліць яго сьвятлом жывых.

³¹Уважай, Ёве, паслухай мяне, і памаўчы, і я прамоўлю. ³²Калі маеш словы, адкажы мне. Прамоў, бо хачу, каб ты аказаўся праведным. ³³Калі ж ня маеш, паслухай мяне. Маўчы, і я навучу цябе мудрасьці».