Salmos 7

שגיון לדוד אשר שר ליהוה על דברי כוש בן ימיני יהוה אלהי בך חסיתי הושיעני מכל רדפי והצילני:a

²פן יטרף כאריה נפשי פרק ואין מציל:

³יהוה אלהי אם עשיתי זאת אם יש עול בכפי:

⁴אם גמלתי שולמי רע ואחלצה צוררי ריקם:

⁵ירדף אויב נפשי וישג וירמס לארץ חיי וכבודי לעפר ישכן סלה:

⁶קומה יהוה באפך הנשא בעברות צוררי ועורה אלי משפט צוית:

⁷ועדת לאמים תסובבך ועליה למרום שובה:

⁸יהוה ידין עמים שפטני יהוה כצדקי וכתמי עלי:

⁹יגמר נא רע רשעים ותכונן צדיק ובחן לבות וכליות אלהים צדיק:b

¹⁰מגני על אלהים מושיע ישרי לב:c

¹¹אלהים שופט צדיק ואל זעם בכל יום:d

¹²אם לא ישוב חרבו ילטוש קשתו דרך ויכוננה:

¹³ולו הכין כלי מות חציו לדלקים יפעל:

¹⁴הנה יחבל און והרה עמל וילד שקר:e

¹⁵בור כרה ויחפרהו ויפל בשחת יפעל:f

¹⁶ישוב עמלו בראשו ועל קדקדו חמסו ירד:

¹⁷אודה יהוה כצדקו ואזמרה שם יהוה עליון:g