Numbers 16:28-35

²⁸וַיֹּאמֶר מֹשֶׁה, בְּזֹאת תֵּדְעוּן, כִּי־יְהוָה שְׁלָחַנִי, לַעֲשׂוֹת אֵת כָּל־הַמַּעֲשִׂים הָאֵלֶּה; כִּי־לֹא מִלִּבִּי׃

²⁹אִם־כְּמוֹת כָּל־הָאָדָם יְמֻתוּן אֵלֶּה, וּפְקֻדַּת כָּל־הָאָדָם, יִפָּקֵד עֲלֵיהֶם; לֹא יְהוָה שְׁלָחָנִי׃

³⁰וְאִם־בְּרִיאָה יִבְרָא יְהוָה, וּפָצְתָה הָאֲדָמָה אֶת־פִּיהָ וּבָלְעָה אֹתָם וְאֶת־כָּל־אֲשֶׁר לָהֶם, וְיָרְדוּ חַיִּים שְׁאֹלָה; וִידַעְתֶּם כִּי נִאֲצוּ הָאֲנָשִׁים הָאֵלֶּה אֶת־יְהוָה׃

³¹וַיְהִי כְּכַלֹּתוֹ, לְדַבֵּר אֵת כָּל־הַדְּבָרִים הָאֵלֶּה; וַתִּבָּקַע הָאֲדָמָה אֲשֶׁר תַּחְתֵּיהֶם׃

³²וַתִּפְתַּח הָאָרֶץ אֶת־פִּיהָ, וַתִּבְלַע אֹתָם וְאֶת־בָּתֵּיהֶם; וְאֵת כָּל־הָאָדָם אֲשֶׁר לְקֹרַח, וְאֵת כָּל־הָרֲכוּשׁ׃

³³וַיֵּרְדוּ הֵם וְכָל־אֲשֶׁר לָהֶם חַיִּים שְׁאֹלָה; וַתְּכַס עֲלֵיהֶם הָאָרֶץ, וַיֹּאבְדוּ מִתּוֹךְ הַקָּהָל׃

³⁴וְכָל־יִשְׂרָאֵל, אֲשֶׁר סְבִיבֹתֵיהֶם נָסוּ לְקֹלָם; כִּי אָמְרוּ, פֶּן־תִּבְלָעֵנוּ הָאָרֶץ׃

³⁵וְאֵשׁ יָצְאָה מֵאֵת יְהוָה; וַתֹּאכַל, אֵת הַחֲמִשִּׁים וּמָאתַיִם אִישׁ, מַקְרִיבֵי הַקְּטֹרֶת׃ פ