Luke 15:20-32

²⁰ויקם ויבא אל אביו עודנו מרחוק ואביו ראהו ויהמו מעיו וירץ ויפל על צואריו וישקהו:i

²¹ויאמר אליו הבן אבי חטאתי לשמים ולפניך ואני נקלתי מהקרא עוד בנך:j

²²ויאמר האב אל עבדיו הוציאו את השמלה הטובה מכלן והלבישהו ותנו טבעת על ידו ונעלים ברגליו:k

²³והביאו את עגל המרבק וטבחו אתו ונאכלה ונשמח:

²⁴כי זה בני היה מת ויחי ואובד היה וימצא ויחלו לשמח:l

²⁵ובנו הגדול היה בשדה ויהי כאשר בא ויקרב אל הבית וישמע קול זמרה ומחלות:

²⁶ויקרא אל אחד הנערים וישאל מה זאת:

²⁷ויאמר אליו כי בא אחיך ויטבח אביך את עגל המרבק על אשר הושב לו שלם:

²⁸ויחר לו ולא אבה לבוא הביתה ויצא אביו וידבר על לבו:

²⁹ויען ויאמר אל אביו הנה זה שנים רבות אני עבד אתך ומימי לא עברתי את מצותך ומימי לא נתת לי גדי למען אשיש עם רעי:

³⁰ויבא בנך זה אשר בלע את נחלתך עם הזנות ותזבח לו את עגל המרבק:

³¹ויאמר אליו בני אתה תמיד עמדי וכל אשר לי לך הוא:

³²אבל נכון לשוש ולשמח כי אחיך זה היה מת ויחי ואבד היה וימצא:m