Numbers 32:1-42

¹א ומקנה רב היה לבני ראובן ולבני גד--עצום מאד ויראו את ארץ יעזר ואת ארץ גלעד והנה המקום מקום מקנה

²ב ויבאו בני גד ובני ראובן ויאמרו אל משה ואל אלעזר הכהן ואל נשיאי העדה לאמר

³ג עטרות ודיבן ויעזר ונמרה וחשבון ואלעלה ושבם ונבו ובען

⁴ד הארץ אשר הכה יהוה לפני עדת ישראל--ארץ מקנה הוא ולעבדיך מקנה  {ס}

⁵ה ויאמרו אם מצאנו חן בעיניך--יתן את הארץ הזאת לעבדיך לאחזה  אל תעברנו את הירדן

⁶ו ויאמר משה לבני גד ולבני ראובן  האחיכם יבאו למלחמה ואתם תשבו פה

⁷ז ולמה תנואון (תניאון) את לב בני ישראל--מעבר אל הארץ אשר נתן להם יהוה

⁸ח כה עשו אבתיכם בשלחי אתם מקדש ברנע לראות את הארץ

⁹ט ויעלו עד נחל אשכול ויראו את הארץ ויניאו את לב בני ישראל--לבלתי בא אל הארץ אשר נתן להם יהוה

¹⁰י ויחר אף יהוה ביום ההוא וישבע לאמר

¹¹יא אם יראו האנשים העלים ממצרים מבן עשרים שנה ומעלה את האדמה אשר נשבעתי לאברהם ליצחק וליעקב  כי לא מלאו אחרי

¹²יב בלתי כלב בן יפנה הקנזי ויהושע בן נון  כי מלאו אחרי יהוה

¹³יג ויחר אף יהוה בישראל וינעם במדבר ארבעים שנה--עד תם כל הדור העשה הרע בעיני יהוה

¹⁴יד והנה קמתם תחת אבתיכם--תרבות אנשים חטאים  לספות עוד על חרון אף יהוה--אל ישראל

¹⁵טו כי תשובן מאחריו ויסף עוד להניחו במדבר ושחתם לכל העם הזה  {ס}

¹⁶טז ויגשו אליו ויאמרו גדרת צאן נבנה למקננו פה וערים לטפנו

¹⁷יז ואנחנו נחלץ חשים לפני בני ישראל עד אשר אם הביאנם אל מקומם וישב טפנו בערי המבצר מפני ישבי הארץ

¹⁸יח לא נשוב אל בתינו--עד התנחל בני ישראל איש נחלתו

¹⁹יט כי לא ננחל אתם מעבר לירדן והלאה  כי באה נחלתנו אלינו מעבר הירדן מזרחה  {פ}

²⁰כ ויאמר אליהם משה אם תעשון את הדבר הזה  אם תחלצו לפני יהוה למלחמה

²¹כא ועבר לכם כל חלוץ את הירדן לפני יהוה עד הורישו את איביו מפניו

²²כב ונכבשה הארץ לפני יהוה ואחר תשבו--והייתם נקים מיהוה ומישראל והיתה הארץ הזאת לכם לאחזה--לפני יהוה

²³כג ואם לא תעשון כן הנה חטאתם ליהוה ודעו חטאתכם אשר תמצא אתכםa

²⁴כד בנו לכם ערים לטפכם וגדרת לצנאכם והיצא מפיכם תעשו

²⁵כה ויאמר בני גד ובני ראובן אל משה לאמר  עבדיך יעשו כאשר אדני מצוה

²⁶כו טפנו נשינו מקננו וכל בהמתנו--יהיו שם בערי הגלעד

²⁷כז ועבדיך יעברו כל חלוץ צבא לפני יהוה--למלחמה  כאשר אדני דבר

²⁸כח ויצו להם משה את אלעזר הכהן ואת יהושע בן נון ואת ראשי אבות המטות לבני ישראל

²⁹כט ויאמר משה אלהם אם יעברו בני גד ובני ראובן אתכם את הירדן כל חלוץ למלחמה לפני יהוה ונכבשה הארץ לפניכם--ונתתם להם את ארץ הגלעד לאחזה

³⁰ל ואם לא יעברו חלוצים אתכם--ונאחזו בתככם בארץ כנען

³¹לא ויענו בני גד ובני ראובן לאמר  את אשר דבר יהוה אל עבדיך כן נעשה

³²לב נחנו נעבר חלוצים לפני יהוה ארץ כנען ואתנו אחזת נחלתנו מעבר לירדן

³³לג ויתן להם משה לבני גד ולבני ראובן ולחצי שבט מנשה בן יוסף את ממלכת סיחן מלך האמרי ואת ממלכת עוג מלך הבשן  הארץ לעריה בגבלת--ערי הארץ סביב

³⁴לד ויבנו בני גד את דיבן ואת עטרת ואת ערער

³⁵לה ואת עטרת שופן ואת יעזר ויגבהה

³⁶לו ואת בית נמרה ואת בית הרן  ערי מבצר וגדרת צאן

³⁷לז ובני ראובן בנו את חשבון ואת אלעלא ואת קריתים

³⁸לח ואת נבו ואת בעל מעון מוסבת שם--ואת שבמה ויקראו בשמת את שמות הערים אשר בנו

³⁹לט וילכו בני מכיר בן מנשה גלעדה--וילכדה ויורש את האמרי אשר בה

⁴⁰מ ויתן משה את הגלעד למכיר בן מנשה וישב בה

⁴¹מא ויאיר בן מנשה הלך וילכד את חותיהם ויקרא אתהן חות יאיר

⁴²מב ונבח הלך וילכד את קנת ואת בנתיה ויקרא לה נבח בשמו  {פ}